LARRA SOINU TRESNAK
Ultzamako tailer estudio honen atea zabalduz gero, Iñaki Larrayoz Arano aurkituko duzu beste aldean. Ziur aski lanerako arropaz jantzita eta egurra lantzen, zirkuitu elektronikoren bat begiratzen edo kitarraren bat ajustatzen.
Zaila da data zehazten, baina 2020aren bukaeran jarriko zuen martxan Iñakik Larra Soinu Tresnak. Tailerra aurrena; ondoren, estudioa. 2021ean, egin zuen lehenengo grabaketa.
Baina, ideia buruan zerabion oso gaztetatik, Legoekin jolasten orduak ematen zituenetik edo haurrentzako argitaratutako 'Zuk egin dezakezu. Asmatzea dibertigarria da' liburuxkak gordetzen zituenetik, agian. Zein zen ideia hori? Estudio ekipoak, musika aparatoak eta tresnak konpontzea, bigarren bizitza bat ematea.
Beharbada gauzak sortzearen eta egitearen ideia horrek bultzatuta ikasi zuen injenieritza. Ondoren, aerosorgailuetan egin du lan hamar urtez.
Baina lanak ez zuen asetzen, eskuekin lan egitea oso garrantzitsua izan baita beti berarendako.
Azkenean, 2019an, lana utzi eta buruan zerabion hori gauzatzea erabaki zuen.
Obra hasi zuen gurasoena izandako bajeran -Eremu eta La Betty Traban musika taldeen entsegu lokala-. Izan ere, betidanik kitarra jotzen du Iñakik, gaur egun Larra Bideak bakarkako proiektuan.
Lokala eta estudioa eraikitzea izan da enpresa txiki honen lehenengo 'eskulana'. Esan bezala, 2020tik, obra bukatu zuenetik, tailerraren eta estudioaren ateak zabalik daude. Bertan egiten duena ikusi nahi baduzu arakatu webgunea.